Buyuk Britaniya TIV sichqon ovlovchi xizmat mushugini ovqatlantirishni taqiqladi

Buyuk Britaniya TIV rahbarining doimiy o‘rinbosari Saymon MakDonald o‘z xodimlariga sichqon ovlovchi xizmat mushugi Palmerstonni ovqatlantirishni taqiqladi. Bu haqda TJournal xabar berdi.

Bunday chora ko‘rishga idorada tarqalgan mish-mishlar sabab bo‘lgan. Unga ko‘ra, Palmerston vazirlik xodimlari tomonidan tez-tez ovqatlantirilgani sababli mushuk o‘zining asosiy vazifasi bo‘lgan sichqon ovlashni uddalay olmayapti.

Rasmiy ma’lumotlarga ko‘ra, Palmerston xizmatning birinchi yilida 27 ta kemiruvchini ushlagan. Bu ko‘rsatgich bilan u bosh vazirning o‘z vazifasini bajarmaganlikda va sichqonlar bilan o‘ynaganlikda ayblangan Larri laqabli sichqon ovlovchi mushugidan o‘zib ketgan.