Braziliya prezidenti tirikligini isbotlamagani uchun pensiyadan quruq qoldi

Braziliya prezidenti Mishel Temer tegishli idoralarga tirikligini isbotlamagani uchun pensiyadan quruq qoldi. Bu haqda “Korrespondent.net” xabar bermoqda.

78 yoshli Temer 1999-yilda San-Pauluda nafaqaga chiqqan, bungacha u shtat prokurori bo‘lib ishlagandi.

Braziliyada pensionerlar har yili tavallud kuni “tirikligining isboti” deb ataladigan qayta ro‘yxatdan o‘tish jarayonini o‘tashi lozim. Temerning tug‘ilgan kuni 23-sentabrga to‘g‘ri keladi, biroq u zarur hujjatlarni vaqtida taqdim etmagani uchun noyabr va dekabr pensiyasidan mahrum bo‘ldi.

Prezident ma’muriyati vakillari davlat rahbari bandligi sababli jarayonni o‘tkazib yuborgani, barcha kerakli hujjatlar endi jo‘natilganini ma’lum qildi.