Farg‘onaning Rishton, So‘x va Buvayda tumanlariga yangi hokimlar tayinlandi

Farg‘ona viloyatining Rishton, So‘x va Buvayda tumanlarida xalq deputatlari tuman kengashlarining navbatdan tashqari sessiyalari bo‘lib o‘tdi. Bu haqda Farg‘ona viloyati hokimligidagi manba “Daryo”ga ma’lum qildi.

Har uchala tumandagi yig‘ilishlarda tashkiliy masalalar ko‘rilib, hududlarga yangi hokimlar tayinlangan. Rishton, So‘x va Buvaydadagi bu yig‘ilishlarda viloyat hokimi Shuhrat G‘aniyev ham qatnashgan.

Xabar berishlaricha, Rishton tumani hokimi G‘ayrat Mamadaliyev o‘z arizasiga ko‘ra vazifasidan ozod qilingan. Uning o‘rniga shu vaqtgacha So‘x tumaniga rahbarlik qilib kelgan Tavakkal Rahimov Rishtonga hokim etib tayinlangan.

Farg‘ona viloyati IIB Huquqbuzarliklarning oldini olish boshqarmasiga rahbarlik qilib kelayotgan Farrux O‘sarov esa So‘x tumaniga hokim etib tayinlangan.

Shuningdek, Alibek Tursunov viloyat hokimining o‘rinbosari etib tayinlangani munosabati bilan, Buvayda tumani hokimi lavozimidan ozod etilgan. Uning o‘rniga Bag‘dod tumani hokimi o‘rinbosari Behzod Ibragimov Buvaydaga hokim bo‘lgan.