Meksika suvosti g‘oridan yoshi 10 ming yildan ortiq inson qoldiqlari topildi

Meksikaning Yukatan yarimorolida joylashgan eng yirik suvosti g‘orlari tizimida o‘n ming yil avval yashagan inson qoldiqlari topildi. Bu haqda tadqiqot loyihasi rahbari Gilyermo de Anda ma’lum qildi, deb yozadi “TASS”.

Antropologiya va tarix milliy instituti xodimi fikricha, jasad qoldiqlari holati qadimgi odamning o‘limiga allaqanday halokatli hodisa sabab bo‘lganligini taxmin qilish imkonini beradi.

“Skelet aynan kimga tegishli ekanligini hali aniqlash lozim. Buning uchun nima yuz berganligini tushunish uchun loyihaga antropolog qo‘shiladi”, — deydi Anda.