“Matritsa” filmida ishlatilgan Nokia 8110 telefoni qaytadan sotuvga chiqadi

Nokia brendi ostidagi qurilmalarni ishlab chiquvchi HMD Global kompaniyasi Mobile World Congress ko‘rgazmasida Nokia 8110 savdosini qayta boshlashi haqida e’lon qildi, deb yozadi “RIA Novosti”.

Korpusi egik ko‘rinishda va old panelida himoya qopqog‘i bo‘lgan telefon 1996-yilda chiqarilgan edi. Qurilmaga shakli tufayli “banan” deb laqab qo‘yishdi, ammo u “Matritsa” filmida qo‘llanilganidan keyin katta mashhurlikka erishdi.

Yangilangan versiya ikki xil — qora va sariq rangda taqdim etiladi. Telefon 4G-tarmoqlarga va Wi-Fi’ga ulana oladi, unda bir nechta eng ommabop dasturlar bo‘ladi. Yangi Nokia 8110 79 yevro narxda sotiladi.