Twitter’da barcha foydalanuvchilar uchun verifikatsiya ochilishi rejalashtirilmoqda

Twitter ijtimoiy tarmog‘ining bosh direktori Jek Dorsi kompaniya barcha foydalanuvchilar uchun verifikatsiyani (foydalanuvchining haqiqiy ekanligini tekshirish) amalga kiritish ustida ishlayotgani haqida ma’lum qildi. Bu haqda TJournal xabar berdi.

Dorsining so‘zlariga ko‘ra, Twitter’ning maqsadi verifikatsiyani barcha uchun ochish hisoblanadi. Kompaniya foydalanuvchilar o‘zi haqida ko‘proq ma’lumotni tasdiqlashini va xizmat o‘ziga javobgarlikni olmasligini xohlamoqda.

Bosh direktor verifikatsiya jarayoni qanday qurilishi haqida gapirmagan. Avval Twitter’da verifikatsiyadan o‘tish uchun foydalanuvchi yuqori darajadagi media mashhurligini isbotlashi va ommabop saytlarda e’lon qilingan o‘zi haqidagi materiallarga havolalar taqdim etishi kerak edi.