Po‘lat Bobojonov Tojikiston ichki ishlar vaziri bilan uchrashdi

2018-yil 9—10-mart kunlari O‘zbekiston Prezidenti Shavkat Mirziyoyevning Tojikistonga davlat tashrifi doirasida ichki ishlar vaziri Po‘lat Bobojonov Tojikiston ichki ishlar vaziri Ramazon Rahimzoda bilan uchrashdi. Bu haqda O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasiga tayanib, O‘zA xabar berdi.

Tomonlar idoralararo Muvofiqlashtirish ishchi guruhi faoliyati yuzasidan o‘zaro manfaatli hamkorlikni samarali tashkil etish, O‘zbekiston va Tojikistonning chegara hududlaridagi ichki ishlar organlarining o‘zaro hamkorligi, ikki mamlakat ichki ishlar vazirliklari Akademiyalari delegatsiyalarini almashish yo‘li bilan kadrlarni tayyorlash, qayta tayyorlash va malakalarini oshirish bo‘yicha sheriklik munosabatlarini kengaytirishga oid qator takliflarni ham ko‘rib chiqdi.

Muhokama qilingan masalalar har ikki qardosh mamlakat ichki ishlar organlarining o‘zaro hamkorlikdagi ustuvor vazifalaridan biri bo‘lib qoladi.