O‘zbekistonda harbiy uchuvchilar tomonidan ikki kunlik amaliy parvoz mashg‘ulotlari o‘tkazildi (foto)

Qarshi garnizoni Xonobod qo‘rg‘onchasidagi harbiy aerodromda Mudofaa vazirligi Havo hujumidan mudofaa qo‘shinlari va harbiy havo kuchlariga qarashli harbiy qism harbiy uchuvchilari tomonidan amaliy parvoz mashg‘ulotlari o‘tkazildi. Bu haqda “Daryo”ga Mudofaa vazirligi matbuot xizmati ma’lum qildi.

Tibbiy va ruhiy tayyorgarlikdan o‘tgan mohir harbiy uchuvchilar jangovar shay holatga keltirilgan Su-25 va MiG-29 samolyotlarida bir necha yuz metr balandlikdagi murakkab parvozni amalga oshirdi.

Ikkinchi kuni esa vertolyotchilar harbiy qismi shaxsiy tarkibi amaliy parvoz mashg‘ulotlarini o‘tkazdi. Samo lochinlari Mi-24 va Mi-8 vertolyotlarida “Xonobod – Kattaqo‘rg‘on” yo‘nalishida harakatlandi. Jangovar vertolyotlarda o‘rnatilgan qurollardan otilgan raketalar Markaziy harbiy okrugi “Kattaqo‘rg‘on” dala-o‘quv maydonidagi nishonlarni yakson etdi.