Toshkentda YHXB mashinasi ishtirokida ro‘y bergan YTH oqibatida ikki kishi halok bo‘ldi
28-aprel kuni Toshkent shahrining Yunusobod tumanida “VAZ-2107” avtomobili Yo‘l harakati xavfsizligi boshqarmasi xodimi boshqaruvidagi Lacetti xizmat mashinasi bilan to‘qnashib ketdi. Bu haqda “Gazeta.uz” xabar bermoqda.
“VAZ-2107” haydovchisi fuqaro Orif X. edi. Lacetti YHXB xodimi serjant Murod X. Boshqaruvida edi.
Ijtimoiy tarmoqlarda tarqalgan videodan ma’lum bo‘lishicha, Lacetti katta tezlikda “VAZ-2107”ning orqasiga urilgan.
YTH oqibatida ikki avtomobil haydovchilari, shuningdek, Lacetti yo‘lovchisi YPX inspektori Farhod O. hamda “VAZ-2107” yo‘lovchilari Sherzod Ch. va Omadbek G. tan jarohatlari olib, shifoxonaga yotqizilgan.
“VAZ”da bo‘lgan yana ikki yo‘lovchi — 50–60 yosh orasidagi erkak va ayol YTH joyida halok bo‘ldi. Ularning shaxsi aniqlanmoqda.
Voqea yuzasidan tergov olib borilmoqda.
Manba: Daryo.uz