Qashqadaryodagi YTHda Nexia haydovchisi va uning yo‘lovchisi halok bo‘ldi

Qashqadaryo viloyatining Dehqonobod tumanida 2-may kuni ikki kishining o‘limiga olib kelgan yo‘l-transport hodisasi sodir bo‘ldi. Bu haqda IIV jamoatchilik va OAV bilan aloqalar boshqarmasi ma’lum qildi.

Shu kuni soat 23:30 atrofida Surxondaryo viloyatining Sherobod tumanida yashagan, 1994-yilda tug‘ilgan Sh.Ashurov Nexia rusumli avtomashinasini M-39 “Toshkent—Termiz” yo‘lining 1314-kilometrida haydab ketayotib, yo‘l chetidagi beton to‘siqqa borib urildi.

Hodisa oqibatida haydovchi Sh.Ashurov va uning yo‘lovchisi, 1992-yilda tug‘ilgan F.Xudoyqulova jarohat olib, voqea joyida halok bo‘ldi.

Surishtiruv ishlari olib borilmoqda.