O‘zbekiston noshirlari va kitob savdosi milliy assotsiatsiyasi tashkil etildi

17-may kuni O‘zbekiston matbuot va axborot agentligida O‘zbekiston noshirlari va kitob savdosi milliy assotsiatsiyasining ta’sis konferensiyasi bo‘lib o‘tdi. Bu haqda agentlik matbuot xizmati “Daryo”ga xabar qildi.

Ayni kunda respublikada 140 dan ortiq nashriyot va 450 dan ortiq kitob savdosi majmualari faoliyat ko‘rsatmoqda. Ushbu assotsiatsiya kitob mahsulotlarini nashr etish va xaridorlarga yetkazish bilan bog‘liq barcha masalalarni hal etuvchi mustaqil tuzilma sifatida ish boshlamoqda. Assotsiatsiya bir vaqtning o‘zida aholi, ayniqsa, yoshlar o‘rtasida kitob mutolaasi va kitobxonlik madaniyatini oshirish, bu jarayonlarni keng targ‘ib qilish, nashr va savdo sohasidagi mavjud muammolarni o‘rganish va ularni bartaraf etishni o‘z oldiga maqsad qilgan.

Assotsiatsiya tomonidan kitob savdosiga ixtisoslashgan kitob do‘konlariga maxsus guvohnomalar berilishi joriy etiladi. Guvohnomaga ega bo‘lgan tadbirkorlar doimiy ravishda kitob savdosi, nashriyot faoliyati, xorijiy davlatlarning kitob savdosidagi ilg‘or tajribalari bilan tanishtiriladi va malakasi oshirib boriladi.

Yig‘ilish ishtirokchilari O‘zbekiston noshirlari va kitob savdosi milliy assotsiatsiyasi raisligiga saylagan “O‘zbekiston milliy ensiklopediyasi” davlat ilmiy nashriyoti direktori Erkin Abdurahmonov assotsiatsiya tomonidan mamlakatdagi har bir kitob do‘konida turishi shart bo‘lgan adabiyotlar ro‘yxati ishlab chiqilishi zarurligini ta’kidladi.

Bundan tashqari, ta’sis yig‘ilishida hozirgi kunda yoshlarning ma’naviy-ma’rifiy, badiiy-estetik talablariga javob beradigan kitoblarni yuksak sifat bilan chop etish, joylarga, ta’lim muassasalariga o‘z vaqtida va maqbul narxlarda yetkazish bilan bog‘liq boshqa masalalar muhokama qilindi.