Toshkentda “Moviy gumbazlar” restorani joylashgan xiyobon obodonlashtiriladi

Toshkent hokimligi va IIBB tashabbusi bilan Toshkent markazidagi “Moviy gumbazlar” restorani joylashgan xiyobon obodonlashtiriladi. Bu haqda “Gazeta.uz” IIBB matbuot xizmatiga tayanib xabar berdi.

22-may, seshanba kuni erta tongdan xiyobonni obodonlashtirish ishlari boshlab yuborildi.

Hudud chiqindilar, quruq shox-shabbalardan tozalanib, daraxt shoxlari tartibga keltirilmoqda, piyodalar yo‘laklari qayta yotqizilib, drenaj tizimlari tiklanmoqda, favvoralar ta’mirlanib, yangi fonus va o‘rindiqlar o‘rnatilmoqda.

Shahar hokimligidan “Gazeta.uz”ga tasdiqlanishicha, bu yerdagi yashil hudud saqlab qolinadi. Ko‘chada transport vositalari harakatlanishi haqidagi xabarlar noto‘g‘ri.