Navoiyda Xitoy qurilish kompaniyasiga ishga kiritish uchun pul olgan shaxs ushlandi

Bosh prokuratura huzuridagi Departamentning Navoiy viloyat boshqarmasi xodimlari tomonidan tezkor tadbir o‘tkazildi.

Tadbir davomida fuqaro T. fuqaro Z. ni “Navoiyazot” AJda qurilish ishlarini amalga oshirib kelayotgan Xitoy qurilish kompaniyasida yuqori lavozimda ishlovchi tanishlari orqali ushbu kompaniyaga ishga kiritib qo‘yish evaziga 800 ming so‘mni firibgarlik yo‘li bilan olgan vaqtida ashyoviy dalillar bilan ushlandi.

Mazkur holat yuzasidan fuqaro T.ga nisbatan Jinoyat kodeksining tegishli moddalari bo‘yicha jinoyat ishi qo‘zg‘atilib, tergov harakatlari olib borilmoqda.