Fransiyada noma’lum turdagi yirtqich dinozavr skeleti 2 mln dollarga sotildi

Shu paytgacha noma’lum bo‘lgan turga taalluqli yirtqich dinozavr skeleti 4-iyun kuni Parijdagi Aguttes auksion uyida kimoshdi savdosida 2,3 million dollarga sotildi, deb yozadi “TASS”. Skeletning uzunligi to‘qqiz metr, balandligi 2,6 metrga yetadi.

Xaridor fransiyalik bo‘lib, u lotni sotib olishga muvaffaq bo‘lsa, eksponatni ommaga taqdim etishini aytgan. “Uni hamma ko‘rishi mumkin bo‘ladi, tez orada u muzeyga qo‘yiladi va uni olimlar o‘rganishni boshlaydi”, — dedi auksion uyi rahbari Klod Agyutt.

Xaridor va sotuvchi (britaniyalik biznesmen)ning ism-shariflari oshkor etilmayapti.

Yirtqich dinozavrning qoldiqlari 2013-yilda AQShning Vayoming shtatidan topilgan. Skeletning yoshi 150 million yil deb baholanmoqda va u yaxshi saqlangan — arxeologlar suyaklarning qariyb 70 foizini topishga muvaffaq bo‘lgan.