Jahon Chempionati vaqtida Rossiyada umuman reklamalar bo‘lmaydigan futbol telekanali ishga tushiriladi

Jahon Chempionati vaqtida Rossiyada yangi “Match! Ultra” telekanali ishga tushadi, deb xabar beradi “TASS”.

Telekanal “Gazprom-media Match” va “Rostelekom” kompaniyalari tomonidan ta’sis qilinadi.

Yangi telekanal sutkasiga 24 soat davomida futbol o‘yinlari translyatsiyasini amalga oshiradi. Shuningdek, tomoshabinlar e’tiboriga mualliflik ko‘rsatuvlari va turli tok-shoular ham havola qilib boriladi. Kanalda reklamalar umuman bo‘lmaydi va u eksklyuzivlarni birinchi bo‘lib namoyish etish imtiyoziga ega bo‘ladi.

Telekanalda “Match TV”ning eng yaxshi sharhlovchilari va boshlovchilari ish olib boradi. Jahon Chempionati vaqtida telekanal “Match planeta” o‘rnini egallaydi va 16-iyulgacha faoliyat olib boradi.

Ma’lumot uchun Jahon Chempionati o‘yinlari 14-iyundan 15-iyulga qadar Rossiyaning 11 ta shahridagi stadionlarda bo‘lib o‘tadi.