Yaponiyada “Aum Sinrikyo” sektasi asoschisi qatl qilindi

Yaponiya hukumati “Aum Sinrikyo” sektasi asoschisi Seko Asaxara (haqiqiy ismi Tidzuo Matsumoto)ga nisbatan o‘lim hukmini amalga oshirdi, deya xabar bermoqda “Korrespondent.net” NHK telekanaliga tayanib.

Ta’kidlanishicha, u bilan birga uning yana bir necha safdoshlari qatl qilingan.

Sekta a’zolari bir nechta qotilliklarda va zaharlovchi moddalardan foydalanib uyushtirilgan teraktlarda aybdor deb topilgan.

1994-yilda “Aum Sinrikyo” tarafdorlari Nagano prefekturasidagi Matsumoto shahrida zarin gazini sochgan, oqibatda yetti kishi qurbon bo‘lgan. 1995-yil martida esa sektantlar Tokio metrosida zarin sepib, ikkinchi teraktni amalga oshirgan, o‘shanda 13 kishi halok bo‘lgan, olti mingdan ortiq kishi turli darajada zaharlangan edi.

1995-yil martidan sekta faoliyati dunyoning barcha mamlakatlarida taqiqlangan.

2004-yil fevralida sud Asaxarani osish yo‘li bilan o‘limga hukm qildi. Uning advokatlari hukm ustidan norozilik arizasi berishga urinib, Oliy sudgacha yetdi, ammo u 2006-yil sentabrida ularning apellyatsiyasini rad etdi.