Namanganda 108 yoshli momoga “Shuhrat” medali topshirildi

Prezident farmoniga muvofiq 100 yoshdan oshgan bir guruh o‘zbekistonliklar “Shuhrat” medali bilan taqdirlandi. Ular orasida Yangiqo‘rg‘on tumanida yashovchi 108 yoshli Buxalcha momo Darmonova ham bor. Bu haqda tuman hokimligi axborot xizmati ma’lum qildi.

Buxalcha momo tumanda birinchilardan bo‘lib pilla yetishtirish hadisini olgan. Hududdagi xo‘jaliklarni tashkil etish jarayonida faol qatnashgan, qishloqni obodonlashtirish, yangi yerlarni o‘zlashtirishda jonbozlik ko‘rsatgan. Umumiy mehnat staji esa 40 yildan oshiq.

Onaxon turmush o‘rtog‘i bilan 4 farzandni voyaga yetkazdi, hozirda 21 nabira, 60 chevara va 4 nafar evaraga bosh.

U kishini ayyom arafasida qutlash uchun viloyat hokimligi mutasaddilari, davlat va jamoat tashkilotlari, OAV vakillari Birlashgan qishlog‘idagi xonadonga keldi. Viloyat hokimi Xayrullo Bozorov Prezident nomidan momoni tabriklab, “Shuhrat” medalini taqdi, bayram sovg‘alarini topshirdi.

Qayd etish joizki, “Shuhrat” medali bilan taqdirlanganlar safida tumandagi “Mo‘g‘ol” MFY raisi Abdurasul Hayitov va tuman IIB profilaktika inspektori Olimjon Bulutov ham bor.