Kim Chen In ikki haftalik tanaffusdan keyin omma oldida ko‘rinish berdi

KXDR yetakchisi Kim Chen In Shimoliy Koreya yadro dasturining otasi Chu Gyu Chxanning dafn marosimiga bordi, deb yozadi “RIA Novosti” Koreya Markaziy telegraf agentligiga tayanib.

4-sentabr kuni Janubiy Koreya OAVlari Kim Chen In ikki haftadan buyon omma oldida ko‘rinish bermayotgani, mamlakatning turli korxonalariga tashriflarini ham birdan to‘xtatib qo‘ygani haqida xabarlar tarqatdi. So‘nggi marta u haqda 21-avgust kuni xabar qilingan edi.

Dafn marosimidan olingan suratda Kim Chen Inning ko‘rinishi yaxshi, u ozib ketmagan.

Eslatib o‘tamiz, avvalroq KXDR yetakchisi Kim Chen In rossiyalik artist Iosif Kobzonning vafoti munosabati bilan hamdardlik bildirgan edi.