Malika Diananing sobiq sevgilisi Fransiyada vafot etdi

Malika Diananing oshig‘i bo‘lgan taniqli art-diler Oliver Xoar Fransiyada 73 yoshida vafot etdi, deb yozadi Daily Mail.

Shifokorlar so‘zlariga ko‘ra, uning o‘limiga saraton xastaligi sababchi bo‘lgan.

Xoar shahzoda Charlzning yaqin do‘sti bo‘lgan va malika Diana bilan tanishguniga qadar rafiqasi va uch farzandi bilan yashagan. Xoar va Diananing ishqiy munosabatlari 1992-yilda boshlangan. O‘sha yili Charlz va Diana norasmiy ajralishgan, to‘rt yildan keyingina rasmiy ajrim bo‘lgan.

Xoar hech qachon malika Diana bilan ishqiy munosabatlari haqida omma oldida ochiq gapirmagan, ammo qirollik doirasida ularning maxfiy aloqalari haqida doim mish-mishlar yurgan.