Osiyo taraqqiyot banki O‘zbekistonga 3 mlrd dollar ajratadi

Osiyo taraqqiyot banki O‘zbekiston hukumatiga 3 milliard dollar taqdim etishni rejalashtirmoqda. Bu haqda bankning mamlakatdagi vakolatxonasi ma’lum qildi, deya xabar beradi Sputnik.

“OTB O‘zbekiston bilan yangi 5 yillik sherikchilik strategiyasini tayyorlamoqda. Bank keyingi uch yil mobaynida har yili 1 milliarddan ajratishni rejalashtirmoqda”, — deyiladi bank matbuot xizmati xabarida.

Mablag‘ 2019—2023-yillardagi yangi sherikchilik strategiyasi doirasida ajratiladi.

Kreditlar suv ta’minoti va sanitariyani yaxshilash, sog‘liqni saqlash, transport infrastrukturasi va energetika sektorini rivojlantirish, qishloq joylarida ish o‘rinlari yaratish hamda O‘zbekiston rasmiylari islohotlarini qo‘llab-quvvatlashga sarflanadi.

Ma’lumot uchun, OTB vitse-prezidenti Vensay Jang hukumat bilan sherikchilik strategiyasini muhokama qilish uchun ayni paytda O‘zbekistonda bo‘lib turibdi.