Bekobod tumanida arizachining tilla buyumlari o‘g‘irlanmaganligi aniqlandi

Bekobod tuman Ichki ishlar bo‘limiga tumanning O‘zbekiston mahallasida yashovchi uy bekasi 1982-yilda tug‘ilgan D.Sh. ariza bilan murojaat qilib, o‘z arizasida 2018-yil 23-avgust kuniga o‘tar kechasi noma’lum shaxs, uyda uxlab yotganligidan foydalanib, jami bahosi 6 million so‘m bo‘lgan zargarlik buyumlari va 1 700 000 so‘m pullarini o‘g‘irlab, hodisa joyidan yashiringanligini ma’lum qilgan. Bu haqda Toshkent viloyati ichki ishlar boshqarmasi matbuot xizmati xabar bermoqda.

Bekobod tuman IIB huzuridagi Tergov bo‘limi tomonidan holat yuzasidan O‘zbekiston Respublikasi Jinoyat Kodeksining 169-moddasi 2-qismi “g” bandi bilan jinoyat ishi qo‘zg‘atilgan.

Olib borilgan surishtiruv ishlari davomida, fuqaro D.Sh. o‘zining tilla buyumlari va pullarini uyida boshqa joyga qo‘yganligi aniqlanib, ular topilgan va hech qanday jinoyat sodir etilmaganligi ma’lum bo‘lgan.