Qozog‘istonda eng katta kabob pishirish bo‘yicha jahon rekordi o‘rnatildi (foto va video)

Qozog‘istonning Akmola viloyati Makinsk shahrida 28-sentabr kuni eng katta kabob tayyorlash bo‘yicha yangi jahon rekordi o‘rnatildi, deb yozadi Tengrinews.

Tadbir Makinskda mamlakatdagi eng katta parrandachilik fabrikasi ochilishiga bag‘ishlab tashkil qilindi. Ushbu korxonaning 200 dan ortiq xodimi kabob tayyorlashga jalb etildi.

Taomni pishirish uchun 400 kilogrammdan ziyod parranda go‘shti ishlatildi. Pirovardida kabobning uzunligi 223 metr 65 santimetrga teng bo‘ldi.

Rekord Ginnessning rekordlar kitobi vakillari tomonidan qayd etildi.