Andijonda mashinist yordamchisi tok urishi oqibatida vafot etdi

“O‘zbekiston temir yo‘llari” aksiyadorlik jamiyatiga qarashli Andijon viloyati Asaka tumanidagi “Axtachi” temir yo‘l bekatida baxtsiz hodisa yuz berdi. Bu haqda, Andijon viloyat ichki ishlar boshqarmasiga asoslanib, Uz24 xabar berdi.

27-sentabr kuni soat 01:15 da “Qo‘qon” lokomotiv deposi Andijon filiali mashinist yordamchisi Bahromov Dostonbek teplovoz tepasidagi suvni ko‘rish maqsadida uning ustiga chiqadi.

Dostonbek yuqori kuchlanishli elektr tokiga ehtiyotsizligi oqibatida tegib ketib, tok urishi natijasida voqea joyida vafot etadi.

Mazkur holat yuzasidan tergovga qadar tekshiruv harakatlari olib borilmoqda.