Turkiyada sayyohlar avtobusi qoyaga borib urildi, 28 kishi jabrlandi

Turkiyaning Antaliya viloyatida avtobus ishtirokidagi YTH oqibatida 28 kishi, shu jumladan, 25 nafar ruminiyalik sayyoh jabrlandi, deb yozadi “RIA Novosti”.

Dastlabki ma’lumotlarga ko‘ra, haydovchi Kumluja hududidagi tog‘dan o‘tgan trassada keskin burilish chog‘ida avtobus ustidan nazoratni yo‘qotgan, oqibatda qoya bilan to‘qnashuv sodir bo‘lgan. Sayyohlardan tashqari, haydovchi va Turkiya fuqarolari bo‘lgan ikki nafar gid ham jarohatlangan.

Yaradorlar kasalxonaga yetkazildi. Ularning hayoti xavf ostida emas.