Samarqandda noqonuniy faoliyat yuritgan 16 tadbirkor aniqlandi

Samarqand shahar davlat soliq inspeksiyasi tomonidan davlat ro‘yxatidan o‘tmasdan tadbirkorlik faoliyati bilan shug‘ullanayotgan 16 nafar jismoniy shaxslarning faoliyatiga chek qo‘yildi. Bu haqda “Daryo” muxbiri Farhod Norbo‘tayev xabar berdi.

Jumladan, besh holatda avtomobillarni yuvish faoliyati, yettita holatda avtomobillarni vaqtinchalik saqlash joylari tashkil qilish, ikki holatda maxsus litsenziyasiz gastrol konsert faoliyati bilan shug‘ullanish, ikki holatda savdo faoliyati bilan shug‘ullanayotgan “tadbirkorlar” aniqlangan.

Jumladan, Samarqand shahar, Jomiy ko‘chasi 46-uy yerto‘lasida kiyim-kechaklar savdosi bilan shug‘ullanib kelgan A.Z. faoliyatini boshlashdan avval davlat ro‘yxatidan tadbirkor sifatida o‘tmasdan faoliyat yuritgan. O‘tkazilgan nazorat tadbirida A. Z. hech qanday hujjatlarsiz ish yuritib, 375 million 885 ming so‘mlik 39 turdagi ayollar va bolalar kiyim-kechaklarini savdoga qo‘ygan. A.Z.ning savdoga qo‘ygan mahsulotlari vaqtinchalik daliliy ashyo sifatida olib qo‘yilgan.

“Oktabr oyining o‘tgan davri mobaynida 213 nafar fuqaro yakka tartibdagi tadbirkor sifatida ro‘yxatdan o‘tdi, — deydi Samarqand shahar davlat soliq inspeksiyasi bo‘lim boshlig‘i Lochinbek Rasulov. — 46 nafar faoliyatini vaqtinchalik to‘xtatgan yakka tartibdagi tadbirkorlarning faoliyati tiklandi. Shuningdek, 38 nafar yollanma ishchilar ro‘yxatdan o‘tkazildi”.