AQShda vertolyot quladi, qurbonlar bor

AQShning Florida shtatidagi treylerlar avtoturargohiga vertolyot quladi, oqibatda ikki kishi halok bo‘ldi va yana bir kishi tan jarohati oldi. Bu haqda “Korrespondent.net” xabar bermoqda.

Qayd etishlaricha, aviahalokat Xaylends okrugining Sebring shahrida, vertolyot mahalliy aeroportdan havoga ko‘tarilganidan ko‘p o‘tmay yuz bergan. Ma’lumotlarga ko‘ra, parvoz vaqti vertolyot elektr uzatish liniyalariga urilgan.

“Avariya oqibatida bitta treyler butunlay ishdan chiqdi, yana uchtasi zararlangan. Vertolyot qulagan vaqtda jabrlanuvchi yerda bo‘lgan, uning qo‘li va oyoqlari kuygani uchun shifoxonaga yotqizilgan”, — deyiladi xabarda.