Zoyir Mirzayev Sharof Rashidov tumani hokimiga aylandi

O‘zbekiston bosh vazirining sobiq o‘rinbosari Zoyir Toirovich Mirzayev Jizzax viloyati Sharof Rashidov tumani hokimi lavozimiga tayinlandi. Bu haqda “Kun.uz” xabar bermoqda.

U tuman xalq deputatlari tuman kengashining navbatdan tashqari yig‘ilishida jamoaga tanishtirilgan.

Sharof Rashidov tumaniga shu kungacha Sayfiddin Umarovich Ismailov rahbarlik qilib kelayotgandi. U 2016-yilning dekabrida Jizzax viloyati hokimligidan tuman hokimligiga tushirilgandi (o‘sha vaqtda Jizzax tumani).

Zoyir Mirzayev 29-oktabr kuni prezident farmoni bilan g‘alla ekish va sug‘orish ishlarini tashkil etish jarayonida jiddiy kamchiliklarga yo‘l qo‘ygani bois O‘zbekiston Respublikasi bosh vazirining o‘rinbosari – O‘zbekiston Respublikasi Vazirlar Mahkamasining Qishloq va suv xo‘jaligi, qishloq xo‘jaligi va oziq-ovqat mahsulotlarini qayta ishlash masalalari kompleksining rahbari lavozimidan ozod etilgandi.