O‘zbekiston Respublikasi Bosh prokurori boshchiligidagi delegatsiya Xitoyda o‘zaro hamkorlikni mustahkamlash masalalarini muhokama qildi

O‘zbekiston Respublikasi Bosh prokuraturasi delegatsiyasi Oliy xalq prokuraturasi taklifiga binoan Xitoyga tashrif buyurdi. Bu haqda Bosh prokuratura matbuot xizmati xabar bermoqda. 

Tashrif davomida O‘zbekiston Respublikasi Bosh prokurori Ixtiyor Abdullayevning Xitoy Xalq Respublikasi Oliy xalq prokuraturasi Bosh prokurori Sao Szyanmin bilan uchrashuvi bo‘lib o‘tdi. 

Tomonlar idoralararo hamkorlikning ahvoli va istiqbollarini muhokama qildi, ikki davlatda adolatni ta’minlash va farovonlikni mustahkamlashga qaratilgan sud-huquq islohotlari borasida o‘zaro fikrlar almashdi.

O‘zbekiston Respublikasi Bosh prokuraturasi va Xitoy Xalq Respublikasi Oliy xalq prokuraturasi o‘rtasida 2017—2018-yillarga mo‘ljallangan hamkorlik dasturi hamda Bosh prokuratura Oliy o‘quv kurslari va Oliy xalq prokuraturasi Davlat prokurorlar instituti o‘rtasida o‘zaro anglashuv memorandumi imzolandi.

O‘zbekiston Respublikasi delegatsiyasi tashrif davomida Davlat prokurorlar institutida bo‘ldi, shuningdek, Shanxay shahar prokuraturasining tadbirkorlikni himoya qilish, korrupsiyaga qarshi kurashish va axborot-kommunikatsiya texnologiyalarini joriy etish bo‘yicha faoliyati bilan tanishdi.