Erdo‘g‘onning maslahatchisi: “Frot qalqoni” operatsiyasi Manbijni qo‘lga kiritish bilan yakunlanadi

Turkiya prezidentining maslahatchisi Ilnur Chevik mamlakatning Suriyadagi operatsiyasi Manbij qo‘lga kiritgandan so‘ng yakunlanishini ma’lum qildi.

Bu haqda u Sabah gazetasi va Turkiya hukumatining axborot va matbuot boshqarmasi tomonidan tashkil etilgan matbuot anjumanida ma’lum qildi, deb yozadi “Kommersant.ru”.

“Manbij hududining 85 foizga yaqini va uning yon-atrofi Kurdiston ishchi partiyasi jangarilari tomonidan nazorat qilinmoqda. Turkiya arab aholisini Manbijga qaytarish va uni kurd jangarilaridan tozalash uchun qo‘lidan kelgan barcha ishni qiladi. Manbij qo‘lga kiritilgandan keyin, Turkiya Suriya hududidagi operatsiyasini to‘xtatadi”, — deydi prezident maslahatchisi.

Avvalroq Turkiya tashqi ishlar vaziri Mavlud Chavusho‘g‘li ham Manbij shahrini ozod qilish zarurligini ta’kidlagan edi.

“Daryo”ning Telegram’dagi rasmiy kanali — @toshqindaryo’ga a’zo bo‘ling!