Pekindan Toshkentga uchayotgan samolyotda o‘zbekistonlik ayol farzand ko‘rdi
24-noyabr kuni “Pekin—Toshkent” yo‘nalishi bo‘ylab havoga ko‘tarilgan CZ6027 reysi samolyot bortida chaqaloq dunyoga kelgani munosabati bilan Pekinga qaytib qo‘ngan. Chaqaloqni o‘zbekistonlik Nargiza Qosimova dunyoga keltirgan. Bu haqda Telegram’dagi China-Uzbekistan kanali xabar bermoqda.
Xabar berishlaricha, samolyotda o‘zining beshinchi farzandini dunyoga keltirgan onaning ham, homiladorlikning yettinchi oyida samolyotda tug‘ilgan chaqaloqning ham ahvoli yaxshilanib bormoqda. Ona-bola Pekindagi Hemujia kasalxonasiga joylashtirilgan.
Voqeadan xabardorlarning “Daryo”ga ma’lum qilishicha, samolyotda Toshkentdagi 2-shahar kasalxonasida ishlaydigan er-xotin shifokorlar (fan doktorlari) bo‘lgan. Ular Nargiza Qosimovaga doyalik qilgan. Chaqaloqqa Muhammad Solih deb ism qo‘yilishi kutilmoqda.
Manba: Daryo.uz