Shavkat Mirziyoyev katta Jorj Bushning vafoti munosabati bilan AQSh prezidenti Trampga hamdardlik bildirdi

O‘zbekiston Prezidenti Shavkat Mirziyoyev AQShning 41-prezidenti katta Jorj Bushning vafot etgani munosabati bilan AQSh prezidenti Donald Trampga hamdardlik izhor etdi. Bu haqda O‘zbekiston Prezidenti matbuot xizmati xabar bermoqda.

Eslatib o‘tamiz, katta Jorj Bush 94 yoshida vafot etdi. U 1989—1993-yillarda AQShga prezidentlik qilgan. 1981—1989-yillarda esa AQSh vitse-prezidenti sifatida faoliyat olib borgan.

Katta Jorj Bushning o‘g‘li kichik Jorj Bush esa 2001—2009-yillarda AQSh prezidenti bo‘lgan. 2018-yil aprelida katta Jorj Bushning rafiqasi Barbara Bush 92 yoshida vafot etgan edi.