Tramp katta Jorj Bushning vafoti munosabati bilan 5-dekabrni milliy motam kuni deb e’lon qildi

AQSh prezidenti Donald Tramp mamlakatning 41-prezidenti katta Jorj Bushning vafoti munosabati bilan 5-dekabrni Milliy motam kuni deb e’lon qildi.

Sobiq prezidentning dafn marosimi munosib darajada hurmat-ehtirom bilan o‘tkaziladi. Tramp rafiqasi bilan birga Vashingtondagi cherkovda bo‘lib o‘tadigan marosimda qatnashadi.

Katta Jorj Bush 30-noyabr kuni vafot etdi. U 1989—1993-yillarda AQSh prezidenti, bundan avval esa sakkiz yil (1981—1989) mamlakat vitse-prezidenti lavozimida ishlagan. 1992-yilgi saylovda demokrat Bill Klintonga yutqazgan.

Katta Jorj Bushning vafoti munosabati bilan O‘zbekiston Prezidenti Shavkat Mirziyoyev AQSh prezidenti Donald Trampga hamdardlik bildirdi.