O‘zbekiston Rossiyadan pul jo‘natmalari hajmi bo‘yicha dunyoda ikkinchi o‘rinni egalladi

O‘zbekiston Rossiyadan pul jo‘natmalari hajmi bo‘yicha ikkinchi o‘rinni egalladi. Bu haqda Rossiya Markaziy banki ma’lumotlariga tayanib, “Podrobno.uz” xabar bermoqda.

Rossiyadan jismoniy shaxslarning O‘zbekistonga pul jo‘natmalari 2018-yilning uchinchi choragida 1,2 milliard dollardan oshdi. Reytingda birinchi o‘rinni 2,5 milliard dollar bilan Shveysariya egalladi.

MDH mamlakatlari o‘rtasida O‘zbekiston ancha vaqtdan buyon birinchi o‘rinni egallab kelmoqda. Uchinchi chorak yakunlariga ko‘ra, 779 million dollar jo‘natmalar bilan Tojikiston ikkinchi o‘rinni, 661 million dollar bilan Qirg‘iziston uchinchi o‘rinni egalladi.

O‘zbekistondan bitta jo‘natmaning o‘rtacha summasi 393 dollarni tashkil etdi.