Namanganda ijtimoiy himoyaga muhtoj fuqarolarga 47 ta xonadon kaliti topshirildi

Namangan viloyatidagi kam ta’minlangan oilalar vakillari va og‘ir ijtimoiy holatga tushib qolgan xotin-qizlarga 47 ta xonadon kaliti topshirildi. Bu haqda “Daryo” muxbiri xabar bermoqda.

Viloyat hokimining o‘rinbosari, viloyat xotin-qizlar qo‘mitasi raisi Irodaxon Qo‘chqorovaga ko‘ra, bunday oilalar va mehnatga layoqatsiz ayollar ro‘yxati yil boshida Respublika ishchi guruhi tomonidan shakllantirilgan. Mustaqillik bayrami arafasida ulardan 90 nafari uy-joy bilan ta’minlangan edi.

— Yangiqo‘rg‘on shaharchasidagi “Vodiy” mahallasida joylashgan ko‘p qavatli uydan 2 xonali xonadon ajratildi. Turmushimdan ajragandan keyin o‘g‘lim Seymanbek bilan ikki singlim va jiyanim qatori ota uyimizda uch xo‘jalik yashab kelayotgandik. Shukr, Yangi yil arafasida o‘zimning uyimga ega bo‘ldim, — deydi Yangiqo‘rg‘on tumanidagi “Gaznon” mahallasida yashovchi ikkinchi guruh nogironi Dilrabo Abdug‘afforova.