O‘zbekistonda ko‘chmas mulkni ro‘yxatga olish va u haqda ma’lumot olish soddalashtirildi

O‘zbekiston hukumati Ko‘chmas mulk huquqlarini davlat ro‘yxatidan o‘tkazish tartibi to‘g‘risidagi yangi tahrirdagi nizomni tasdiqladi. Bu haqda Norma’ga tayanib, “Podrobno.uz” xabar bermoqda.

2018-yilning 1-oktabridan ko‘chmas mulkka bo‘lgan huquqni ro‘yxatga olish to‘g‘risidagi guvohnoma bekor qilingan edi. Ro‘yxatga olish elektron shaklda amalga oshiriladi.

Yangi tahrirdagi nizomda quyidagilar aks etgan:

Birinchidan, ko‘chmas mulk obyektlariga bo‘lgan huquqni davlat ro‘yxatidan o‘tkazishning yagona qoidalari belgilangan;

ikkinchidan, yuridik va jismoniy shaxslarga Ko‘chmas mulk obyektlariga bo‘lgan huquqlar davlat reyestri ma’lumotlaridan erkin foydalanish imkoniyati taqdim etilmoqda;

uchinchidan, yuridik va jismoniy shaxslarga ko‘chmas mulk obyektlariga bo‘lgan huquqlarini ro‘yxatdan o‘tkazish uchun qulay shart-sharoit yaratish uchun mas’ul organlar o‘rtasida ma’lumotlarni axborot-kommunikatsion almashuv joriy etilmoqda;

to‘rtinchidan, mojarolarni sudgacha hal etish mexanizmi joriy etilmoqda.