Tomas Myuller YChLning 2 ta o‘yinidan diskvalifikatsiya qilindi, endi u “Liverpul”ga qarshi o‘ynamaydi

13-dekabr kuni Yevropa Chempionlar Ligasining guruh bosqichi so‘nggi turida “Bavariya” a’zosi Tomas Myuller “Ayaks”ga qarshi o‘yinda raqibiga ishlatgan qo‘polligi sabab maydondan chetlashtirilgandi. UEFA ushbu holat bo‘yicha so‘nggi qarorni e’lon qildi.

Germaniyalik o‘yinchi 2 ta o‘yinga diskvalifikatsiya qilindi, deb xabar berdi Omnisport.

Shu tariqa, u musobaqaning 1/8 finalida “Liverpul”ga qarshi 2 ta o‘yinda ham yordam bera olmaydi.

Eslatib o‘tamiz, Myuller “Ayaks” himoyachisi Nikolas Talyafiko boshiga oyog‘i bilan zarba berganligi uchun o‘yindan chetlashtirilgan edi. Keyinchalik u raqibidan omma oldida kechirim so‘radi.

Ma’lumot uchun, bu Myullerning karyerasidagi 2-qizil kartochka bo‘ldi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!