Toshkentda sartaroshlik bo‘yicha mahorat darslari tashkil etildi (foto)

Yoshlar ijod saroyida O‘zbekiston Respublikasi Sartaroshlar va kosmetologlar uyushmasi hamda Yoshlar ittifoqi Toshkent shahar kengashi hamkorligida “Zamon bilan hamnafas: Ustoz-shogird an’analari” mavzusida sartaroshlik kasbi bo‘yicha mahorat darslari tashkil etildi. Bu haqda O‘zA xabar bermoqda.

Unda respublika bo‘yicha kelajakda yetuk sartarosh bo‘lishni niyat qilgan yoshlar ishtirok etdi. Tadbirda malakali sartaroshlar tomonidan yoshlar uchun master-klass o‘tildi.

“Sartaroshlik kasbi bilan 8 yildan buyon shug‘ullanaman, — deydi Samarqand shahridan kelgan sartarosh Rohila Hayitova. — Menga asosan kelinlar obrazini yaratish yoqadi. Mahorat darslari davomida hamkasblarim bilan tajriba almashdik. Mohir sartaroshlardan kasbimizning yanada nozik qirralarini o‘rgandik. Bu, albatta, bizning kelgusi ish jarayonlarimizda qo‘l keladi”.