Polshaning Gdansk shahri meriga xayriya konserti chog‘ida pichoq urildi

Polshaning Gdansk shahri meri Pavel Adamovich xayriya konserti chog‘ida pichoq bilan uyushtirilgan hujumdan so‘ng og‘ir holatda kasalxonaga yetkazildi. Bu haqda “RIA Novosti” xabar bermoqda.

Adamovich turgan sahnaga yugurib chiqqan erkak Polshaning oldingi hukumati davrida noqonuniy qamoqqa tashlangani haqida baqir-chaqir qila boshladi. Shundan so‘ng olishuv boshlanib ketdi va mer pichoq bilan yaralandi.

Adamovich kasalxonaga yetkazildi va operatsiya qilindi, biroq yuragi va qorniga tig‘ tekkani sababli holati o‘ta og‘irligicha qolmoqda. Shifokorlarga ko‘ra, uning omon qolish-qolmasligi “yaqin soatlar ichida hal bo‘ladi”.