O‘zbekistonda noyob ilmiy obyektlarni aniqlash mezonlari belgilandi
Hukumat qarori bilan Noyob ilmiy obyektlarni aniqlash, ularni saqlash va monitoringini olib borish tartibi to‘g‘risidagi nizom tasdiqlandi. Bu haqda Adliya vazirligining “Huquqiy axborot” Telegram-kanalida xabar berildi.
Obyektlarni noyob ilmiy obyektlar deb topish Innovatsion rivojlanish vazirligi tomonidan amalga oshiriladi.
Nizomga muvofiq, noyob ilmiy obyekt deb hisoblashda obyektlar quyidagi mezonlar asosida baholanadi:
obyektning respublikada yagonaligi;
obyektning ilmiy-amaliy ahamiyatga ega bo‘lishi va ilmiy tadqiqotlarda foydalanilayotgan bo‘lishi;
tegishli sohada ushbu obyektsiz fundamental yoki amaliy tadqiqot olib borishning imkonsizligi;
obyektning moddiy jihatdan yuqori qiymatga egaligi.
Obyektlarni noyob ilmiy obyektlar deb topish bo‘yicha takliflar 1-aprelgacha qabul qilinadi hamda 30-aprelgacha noyob ilmiy obyektlar deb topilgan obyektlar ro‘yxati e’lon qilinadi.
Tasarrufida noyob ilmiy obyekt bo‘lgan muassasa rahbari obyektning saqlanishi uchun javobgardir.
Manba: Daryo.uz