Lionel Messi La Ligada yangi rekord o‘rnatdi

“Barselona” hujumchisi Lionel Messi La Liganing 25-turida “Sevilya”ga qarshi kechgan bahsda het-trikka erishdi (4:2).

Argentinalik futbolchi uchrashuvning 26-daqiqasida Ivan Rakitichning uzatmasini golga aylantirib hisobni tenglashtirgan bo‘lsa, 68-daqiqada ham Messi yana bir bor hisobni tenglashtirdi (2:2). 86-daqiqada esa uchinchi golini urib, jamoasini hisobda oldinga olib chiqdi.

Messi umumiy hisobda “Sevilya” darvozasiga 28 ta gol urdi. Bu La Ligada bitta jamoa darvozasiga gol urish bo‘yicha rekord hisoblanadi. Bungacha Krishtianu Ronaldu hamda Messining o‘zi “Sevilya” darvozasiga 25 tadan to‘p kiritib, rekordni bo‘lishib turgandi.

Joriy mavsum Leo Ispaniya chempionatida 25 ta gol urdi va to‘purarlar bahsida yetakchilik qilmoqda.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!