Jaguar Yevropada yilning eng yaxshi avtomobili bo‘ldi

Jaguar I-Pace elektr krossoveri Car of the Year 2019 mukofotini qo‘lga kiritdi, deya xabar beradi “Euronews”.

Jaguar I-Pace Jeneva avtomobil ko‘rgazmasining boshlanishidan ikki kun oldin nufuzli mukofotga sazovor bo‘lgan.

2018-yilning mart oyida chiqarilgan avtomobil Jaguar tarixidagi birinchi elektr avtomobil sanaladi. Shuningdek, u Car of the Year sovrinini qo‘lga kiritgan britaniyalik avtomobil ishlab chiqaruvchisining birinchi modelidir.

Modelda umumiy quvvat 400 ot kuchiga ega ikkita dvigatel mavjud. Quvvat zahirasi 467 kilometrni tashkil qiladi.

Tanlovda Fransiyaning Alpine A110 sport mashinasi ikkinchi, Kia Ceyed xetchbeki uchinchi, Ford Focus esa to‘rtinchi o‘rinni egallagan. Shuningdek, birinchi oltilikka Mercedes-Benz A-Class va Peugeot 508 kirgan.

Car of the Year yil avtomobillari tanlovi 1963-yildan beri o‘tkazildi. Hakamlar hay’ati tarkibiga 23 ta Yevropa mamlakatidan 60 nafar jurnalist kiradi.