Hindiston Pokistonning uchuvchisiz apparatini urib tushirdi

9-mart kuni Hindiston harbiy havo kuchlari mamlakat shimolidagi Rojaston shtati ustida Pokiston hududidan ko‘tarilgan uchish apparatini urib tushirdi.Bu haqda “TASS” xabar berdi.

Qayd etilishicha, uchuvchisiz apparat mahalliy vaqt bilan 19:30 da Ganganagar shahri hududida Hindiston havo hududini buzgan. Hodisa aniqlanishi bilan dron urib tushirilgan.

So‘nggi vaqtlarda ikki mamlakat munosabatlaridagi keskinlik sezilarli darajada avj olgan. Bunga 14-fevral kuni terrorchi-xudkushning Hindiston shimolidagi Jammu va Kashmir viloyatlarida o‘zini portlatib yuborgani sabab bo‘lgan. Ushbu terakt oqibatida 45 kishi halok bo‘lgan. Hujum uchun javobgarlikni “Jaish-e-Muhammad” (“Muhammad lashkari”) terrorchilik tashkiloti o‘z bo‘yniga olgan. Uning rahbari Ma’sud Azhar esa Pokistonda joylashgan.

Buning ortidan Hindiston Pokistonni terroristik guruhlarni qo‘llab-quvvatlashda ayblagan, Islomobod bu ayblovlarni “asossiz” deya rad etib, Dehlini sodir bo‘lgan voqea yuzasidan birgalikda tekshirish o‘tkazishni taklif qilgan.