Samarqandda Isuzu D-MAX pikaplari ishlab chiqarilishi mumkin

Samarqand avtomobil zavodi (“SamAvto”) tashkil etilganiga 20 yil to‘ldi. Shu munosabat bilan zavodda yubiley sanaga bag‘ishlangan tantanali marosim o‘tkazildi.

“Zarnews.uz”ning xabar berishicha, marosimdan so‘ng yaponiyalik hamkorlar Samarqand viloyati hokimligi va “O‘zavtosanoat” vakillariga Isuzu Motors’ning D-MAX avtomobilini ko‘rsatib, kelgusida zavodda ushbu turadgi avtomashinalarni ham ishlab chiqarishni rejalashtirilayotganini ma’lum qilgan.

Ma’lumot uchun, Samarqandda Isuzu D-MAX pikaplari ishlab chiqarilishi mumkinligi haqidagi xabarlar ilk bor 2017-yil yanvarida paydo bo‘lgandi. O‘shanda “O‘zavtosanoat” kompaniyasi matbuot xizmati ikkita avtomobil namuna tariqasida O‘zbekistonga olib kelingani, ularni ishlab chiqarish haqidagi gap-so‘zlar “hech qanday asosga ega emasligi”ni ma’lum qilgandi.

Qayd etish joiz, O‘zbekiston bosh vaziri Abdulla Aripovning 2017-yil noyabrida Germaniyaga amalga oshirgan tashrifi yakunlariga ko‘ra, Samarqandda Volkswagen Amarok pikapini ishlab chiqarish bo‘yicha kelishuv imzolangan edi. O‘shanda ushbu loyiha 2018—2019-yillarda amalga oshirilishi rejalashtirilayotgani ta’kidlangan edi.