Farg‘onada 600 ming so‘m evaziga o‘z uyida qo‘shmachilik bilan shug‘ullangan fuqaro qo‘lga olindi

2-aprel kuni Farg‘ona viloyatining Qo‘shtepa tumanida yashovchi fuqaro T.A.ning arizasiga asosan iqtisodiy jinoyatlarga qarshi kurashish departamenti va Farg‘ona shahar IIB xodimlari tomonidan o‘tkazilgan tadbir davomida o‘z uyida qo‘shmachilik bilan shug‘ullangan fuqaro qo‘lga olindi. Bu haqda «Daryo»ga viloyat IIB matbuot xizmati xabar berdi.

Farg‘ona shahar Al-Xorazmiy MFYda yashovchi X.M. o‘z uyida Quva tumanida yashovchi tanishi B.D. va arizachi T.A.larga 600 ming so‘m pul evaziga jinsiy aloqa qilish uchun sharoit yaratib berganligi aniqlandi.

Mazkur holat yuzasidan fuqaro X.M.ga nisbatan Jinoyat Kodeksining 131-moddasi 2-qismi (fohishaxona tashkil etish yoki saqlash) bilan jinoyat ishi qo‘zg‘atilgan. Hozirda tergov harakatlari olib borilmoqda.