Ichki ishlar vaziri o‘rinbosari Farg‘onada sayyor qabul o‘tkazmoqda

Ichki ishlar vaziri o‘rinbosari aholi bilan muloqot qilish, mavjud dolzarb muammolarni aniqlash va ularni joyida bartaraf etish maqsadida 9–11-aprel kunlari Farg‘ona viloyatida sayyor qabul o‘tkazmoqda. Bu haqda “Daryo” muxbiri xabar bermoqda.

Farg‘ona viloyati Xalq qabulxonasida 9-aprel kuni o‘tkazilgan sayyor qabulda 85 nafar fuqaroning ichki ishlar idoralariga ishga kirish va xizmatga qayta tiklash, xorijga chiqish-kelish, fuqarolikni rasmiylashtirish, yo‘l harakati xavfsizligini ta’minlash, mol-mulk va boshqa buyumlarni olib qo‘yish yoki qaytarmaslik, ichki ishlar idoralari xodimlarining noo‘rin xatti-harakatlaridan norozilik masalalariga oid murojaatlari tinglandi.

Qabul jarayonida muammolarning 25 tasi joyida ijobiy hal etildi. Qo‘shimcha o‘rganish talab etiladigan 22 murojaatning ko‘rib chiqilishi nazoratga olindi, 9 tasi qonuniy asoslarga ko‘ra rad etildi, 29 tasi bo‘yicha asoslantirilgan huquqiy tushuntirish berildi.

Jumladan, uy-joy ajratilishini so‘rab murojaat qilgan 1965-yilda tug‘ilgan fuqaro S.Burhonovaga Farg‘ona shahar Q.Murtazoyev ko‘chasida joylashgan 16-uyning 15-xonadoni yashash uchun ajratib berildi. Bundan tashqari, 5 nafar fuqaro nogironlik aravachasi, 3 nafar fuqaro eshitish uskunasi bilan ta’minlandi.

Bugun, 10-aprel kuni vazir o‘rinbosari Rishton tumani hokimligida fuqarolarni qabul qilmoqda. Vazir o‘rinbosarining aholi bilan muloqoti 11-aprel kuni Qo‘qon shahrida bo‘lib o‘tadi.