Italiya gegemoni “Yuventus” Chempionlar ligasining chorak finaliga yo‘llanma oldi
Turinning “Yuventus” klubi Yevropa Chempionlar ligasidagi yurishini davom ettiradi. Nimchorak finalning ilk o‘yinida “Portu” maydonidan 2:0 hisobidagi g‘alaba bilan qaytgan Massimiliano Allegri jamoasi, javob o‘yinida 1:0 hisobida zafar quchdi.
O‘yin kulminatsiyasi 40-daqiqaga to‘g‘ri keldi. Uchrashuvni boshqarib borgan ruminiyalik hakam “Portu” futbolchisini maydondan chetlatdi va mehmonlar darvozasiga penalti tayin qildi. Uni argentinalik hujumchi Paulo Dibala aniq amalga oshirib, jamoasiga g‘alaba keltirgan golga mualliflik qildi.
Qayd etish kerak, “Yuventus” Italiya A seriyasining shov-shuvli o‘tgan so‘nggi turida ham penalti sabab zafar quchgan bo‘lib, o‘shanda hakam 96-daqiqada “Milan” darvozasiga penalti tayin qilgandi. Shuningdek, Italiya kubogining “Napoli”ga qarshi o‘yinida ham aynan penalti Turin klubining joniga oro kirgandi.
Yevropa Chempionlar ligasi
1/8 final
14-mart, seshanba
Gollar: Paulo Dibala, 42-pen (1:0).
Chetlatish: Maksi Pereyra, 40 (P).
Dastlabki uchrashuv: 2:0