Anjelina Joli familyasini o‘zgartirdi

Gollivud aktrisasi Anjelina Joli Bred Pitt bilan rasman ajrashgach, ikkitali Joli-Pitt familyasidan ozod bo‘ldi. U endi yana barcha hujjatlarda Anjelina Joli deb qayd qilinadi. Bu haqda Sputnik xabar berdi.

12-aprel kuni sud Anjelina Joli va Bred Pittning ajrim da’vosini ma’qullab qaror chiqargan. Shu bilan birga, ushbu qaror sobiq er-xotinlarning bola qaramog‘i va mulkni taqsimlash to‘g‘risidagi bitim bo‘yicha ishlashiga imkon beradi. Bu jarayon bir necha oyga cho‘zilishi mumkin.

Joli va Pitt 2014-yil turmush qurgan edi. Nikoh marosimi Fransiyadagi Miraval saroyida bo‘lib o‘tgan. Birga yashagan payti juftlik 3 nafar farzand ko‘rgan. Bundan tashqari yana 3 nafar farzand asrab olgan. 2016-yil Joli ajrashish uchun ariza bergan. U turmush o‘rtog‘ining tarbiya metodlaridan norozi bo‘lganini sabab qilib ko‘rsatgan. Aktrisa farzandlarini bir o‘zi tarbiyalashni xohlagan.