O‘zbekiston matbuot erkinligi reytingida ko‘tarildi, ammo ro‘yxatning oxirida qolmoqda

“Chegara bilmas muxbirlar” xalqaro nodavlat tashkiloti (Reporters sans fronti?res, RSF) har yillik matbuot erkinligi reytingini e’lon qilgan (veb-saytga O‘zbekistondan kirish imkonsiz), deya xabar beradi “Gazeta.uz”.

O‘zbekiston unda 160-o‘rinni egallagan hamda matbuot erkinligining eng yomon pozitsiyasiga ega bo‘lgan mamlakatlar ro‘yxatini tark etgan. O‘tgan yili O‘zbekiston ro‘yxatda 165-o‘rinni egallagan. Shu bilan birga, hozirgi holat RSF tomonidan “yomon” (bad) deb baholanmoqda.

“Nazorat, senzura va o‘z-o‘zini senzura qilish hali ham mavjud, hukumat esa ommaviy axborot vositalari ustidan nazoratni sezilarli darajada saqlab turibdi”, — deyiladi tashkilot hisobotida.

Qozog‘iston reytingda 158-o‘rinni, Tojikiston esa 161-o‘rinni egallagan. Turkmaniston 180-o‘rinda reytingga yakun yasaydi. Qirg‘iziston matbuot erkinligi bilan bog‘liq vaziyat “muammoli” (problematic) deb baholangan yagona Markaziy Osiyo mamlakatiga aylanib, 83-o‘rinni egallagan.

Rossiya (148-o‘rin), Belarus (153), Ukraina (102), Moldova (91), Armaniston (61) va Gruziya (60) sobiq SSSR mamlakatlari ichida O‘zbekistonga nisbatan yuqorida joylashgan. Boltiqbo‘yi mamlakatlarida vaziyat ancha yaxshi: Litva - 30, Latviya - 24, Estoniya - 11-o‘rin.

Birinchi o‘rni Norvegiya, Finlyandiya ikkinchi, Shvetsiya uchinchi o‘rinni egallagan. Birinchi o‘ntalikka Gollandiya, Daniya, Shveysariya, Yangi Zelandiya, Yamayka, Belgiya va Kosta-Rika kirgan.