O‘zbekistonda ikkita harbiy okrug qo‘shinlari qo‘mondoniga o‘rinbosarlar tayinlandi

Mudofaa vazirining buyrug‘iga ko‘ra Janubi-g‘arbiy maxsus harbiy okrugi va Shimoli-g‘arbiy harbiy okrugi qo‘shinlari qo‘mondoniga tarbiyaviy va mafkuraviy ishlar bo‘yicha o‘rinbosarlar tayinlandi. Bu haqda vazirlik matbuot xizmati xabar berdi.

Polkovnik Iskandar Mallayev Janubi-g‘arbiy maxsus harbiy okrugi qo‘shinlari qo‘mondonining tarbiyaviy va mafkuraviy ishlar bo‘yicha o‘rinbosari etib tayinlandi.

Bunga qadar Iskandar Mallayev Shimoli-g‘arbiy harbiy okrugi qo‘shinlari qo‘mondonining tarbiyaviy va mafkuraviy ishlar bo‘yicha o‘rinbosari lavozimida ishlab kelgan.

Iskandar Mallayev Donesk oliy harbiy-siyosiy muhandis va aloqa qo‘shinlari bilim yurti hamda Qurolli Kuchlar akademiyasini tamomlagan. 2014-yilda “Sodiq xizmatlari uchun” medali bilan taqdirlangan.

Shuningdek, Mudofaa vazirligi Tarbiyaviy va mafkuraviy ishlar bosh boshaqarmasining boshqarma boshlig‘i o‘rinbosari podpolkovnik Nuriddin Qodirov Shimoli-g‘arbiy harbiy okrug qo‘shinlari qo‘mondonining tarbiyaviy va mafkuraviy ishlar bo‘yicha o‘rinbosari lavozimini egallagan.

Nuriddin Qodirov Chirchiq oliy tank qo‘mondonlik-muhandislik bilim yurtini va Qurolli Kuchlar akademiyasini tamomlagan. Xizmati davomida tarbiyaviy va mafkuraviy ishlar organlarida quyi pog‘onalardagi qator lavozimlardan o‘tgan.