Sarvar Otamurodov “O‘zagrosug‘urta”? AJga rahbar bo‘ldi

O‘zbekiston “Milliy tiklanish” demokratik partiyasi markaziy kengashi raisi Sarvar Otamurodov lavozimini tark etdi.

UzReportning xabar berishicha, u “O‘zagrosug‘urta”? aksionerlik jamiyati rahbari lavozimiga tayinlangan.

“O‘zagrosug‘urta” AJga 2017-yilning avgustidan buyon rahbarlik qilib kelgan Saidqahhor Xolxo‘jayev biroz avvalroq Markaziy bank raisiga o‘rinbosar bo‘lgandi.

Sarvar Otamurodov 1973-yilda Toshkent shahrida tug‘ilgan. 1995-yilda Toshkent davlat universitetini (hozirgi O‘zbekiston Milliy universiteti) bitirgan. 1998-yilda O‘zbekiston Respublikasi Bank-moliya Akademiyasini, 2003-yilda O‘zbekiston Respublikasi Prezidenti huzuridagi Davlat boshqaruvi akademiyasini tamomlagan. Sotsiologiya fanlar nomzodi.

Ma’lumot uchun, Sarvar Otamurodov 1995—2006-yillarda O‘zbekiston Respublikasi Moliya vazirligi valyuta-iqtisod Bosh boshqarmasida bo‘lim boshlig‘i, boshqarma boshlig‘i o‘rinbosari va Bosh boshqarma boshlig‘i vazifalarida ishlagan. 2006—2010-yillarda O‘zbekiston sug‘urta kompaniyalarida faoliyat olib borgan.

U O‘zbekiston “Milliy tiklanish” demokratik partiyasi Markaziy Kengashi raisi bo‘lish bilan birgalikda, O‘zbekiston Respublikasi Oliy Majlisi Qonunchilik palatasi Budjet va iqtisodiy islohotlar qo‘mitasi a’zosi, Oliy Majlis Qonunchilik palatasi Spikeri o‘rinbosari hisoblanardi.